Mat 3 | BNP | STEP | Na tahuna iea, e Ioanes, a mari ni vahilolo, i tubu ni leho, i vara na tabeke i ngeki o Iudea.

a 3:2 Mat 4:17; Mrk 1:15

b 3:3Ais 40:3

c 3:42Ki 1:8

e 3:7 Mat 12:34; 23:33

f 3:9Ion 8:33,39; Rom 4:12

g 3:10 Mat 7:19; Luk 13:6-9

h 3:11Ion 1:26-27,33; Apo 1:5

i 3:16Ion 1:32

j 3:17Sng 2:7; Ais 42:1; Mat 12:18; 17:5; Luk 9:35

Matthew 3

E Ioanes a Mari ni Vahilolo

(Markus 1:2-8; Lukas 3:1-18; Ioanes 1:19-28)

1 Na tahuna iea, e Ioanes, a mari ni vahilolo, i tubu ni leho, i vara na tabeke i ngeki o Iudea. 2 ^aI vara maea, “Mu pulo a vilone mua, a vuhuna a harikianga na hunu i tabukoi ge bele.” 3 ^bRe Ioanes, a propet e Isaia i vakalongo muga vona, i ta maea,

“A lohona viri i gale dagi na tabeke i ngeki, i ta maea,
‘Mu pelekadoa a dala ne Bakovi Dagi.
Mu pelekadoa a dala ge laho vona ge kiripiripi.’”
4 ^cA varakia ne Ioanes ni rata na vuna kamel. I rea tata ia na palabele ni rata na kulina meme. ^{▼▼(3:4)A varakia ne Ioanes i manga a varakia ne Elaisa hosi.} I kani a koa, a ame na robo. 5 E huriki lobo o Ierusalem, e huriki lobo na tabeke ne Iudea, e huriki lobo tabukoi na naru e Iordan ri lokovonga maia. 6 Ri taki tala a naro hale ne ria, lakea i vahilolo ria na naru e Iordan.

7 ^ePali na tahuna i matai e huriki a Pariseo, a Sadusi ri valai mai ia ge vahilolo ria, i taki ria, i ta maea, “Mua a tuna mata! E rei i taki mua mu gu ha vona a rongova ne Bakovi Dagi? 8 Mu rata a naro ge vakasiri mu pulo a narone mua. 9 ^fNaha ni luhoi mua, ge mua a hamone Abraham, mu gu malamala pali. Naha ni luhoi mavonga, a vuhuna a Vure i kara ni pulo a kedo nga, ge ria e huriki a hamone Abraham. I vai a kanena narone mua? Mu rata taro a naro kamumu ge vakasiri mua mu pulo muholi a vilone mua. 10 ^gA kira i tabuli tabukoi pali na vuhuna kai. A kai i uka kanena kamumu, bara ni tolo puru, ni rungani.

11 ^h “Iau a vahilolo mua na naru a vuhuna mu pulo a vilone mua. Pali a bakovi tara bara i luve muri nau i tuhaka hateka nau. Iau i uka ma a bakovi kamumu ga bole polo a vahapolo vona. Na tahuna i valai, bara i vahilolo mua na Hanu Kiripiripi, a kanono. 12 Ngane i tabukoi bara i kalipida e huriki a bakovi kamumu, a bakovi hale, i manga a bakovi i leho na hania na vit i kalipida a vit, a luluna. Bara i bole e huriki a bakovi kamumu, i ru ria na tanga kamumu, i manga a bakovi i leho na hania i ru kadolu a vit pololilo na roho na vit. Pali bara i bole e huriki a bakovi hale, i voro rike ria na kanono, i manga a bakovi i leho na hania na vit i bole a luluna vit, i voro rike na kanono. A kanono iea, i uka a nilobona.”

E Isu Ni Vahilolo

(Markus 1:9-11; Lukas 3:21-22; Ioanes 1:31-34)

13 Muri e Isu i pea e Galili i lakea na naru e Iordan, e Ioanes ge vahiloloa. 14 Pali e Ioanes i hehe, i ta maea, “I navai ga vahilolo ioe? Ioe a viri bara o vahilolo iau.”

15 Pali e Isu i koli, “O rata kunanea, a vuhuna i kamumu tu gu rata lobo a maki e Bakovi Dagi i taki tu gu rata.” Lakea e Ioanes i longo, i vahiloloa.

16 ⁱE Ioanes i vahilolo loboa e Isu, lakea e Isu i malaviriri kunana i pea a naru. A hunu i mata ka, lakea i masia a Hanuna Vure i puru valai manga a balu, i toka langa vona. 17 ^jLakea a lohona viri i ta valai na hunu, i ta maea, “Iea e tugu a hategu. A vivi hateka vona.”